IKINYARWANDA, Ururimi Gakondo rudakoreshwa IBUKURU!

Gukoresha uru rurimi Gakondo biracyari inzozi! Imbuga zose za MINISTERI zikoresha ICYONGEREZA(English) ku buryo uvuga IKINYARWANDA gusa byamugora kubona amakuru

Kuri uyu munsi mukuru mpuzamahanga w’Ururimi Gakondo(journée mondiale de la Langue Maternelle)nagize amatsiko yo kureba umwanya IKINYARWANDA gifite mu ikoreshwa ryacyo nk’ururimi Gakondo.

Mpereye ku nsanganyamatsiko y’uyu mwaka mu Rwanda(2021) yagiraga, iti »Tubungabunge Ikinyarwanda, Umusingi w’Ubumwe n’Agaciro by’Abanyarwanda« , nashatse kumenya niba ababishishikariza abandi na bo barabigize ibyabo!

Bitewe kandi n’uko ngo « Umwera uturutse ibukuru bucya wakwiriye hose »nibajije niba Abanyarwanda babona ako GACIRO mu ikoreshwa ry’Ikinyarwanda ibukuru? Ni yo mpamvu nazengurutse ku mbuga zose za Ministeri uko ari 20 kugira ngo ndebe ahaboneka IKINYARWANDA nk’ururimi rw’IBANZE cyangwa se rwa KABIRI. Nabaye nk’ukubiswe n’inkuba!

Ikinyarwanda gikoreshwa hanze y’inzego nkuru za Leta

Gukoresha uru rurimi Gakondo biracyari inzozi! Imbuga zose za MINISTERI zikoresha ICYONGEREZA(English) ku buryo uvuga IKINYARWANDA gusa cyangwa uwashaka amakuru muri urwo rurimi nta handi yayakura uretse kuri Radio!!Reka duhere ahangaha:

Aha ni nko ku IREBERO! Ariko se uvuga IKINYARWANDA hari icyo yahabona?

No kwa Ministri w’Intebe, Icyongereza ni cyo gifite icyicaro.

No mu zindi Ministeri bikaba uruhererekane

Na Ministeri y’Urubyiruko n’Umuco yatengushye UMUCO!

Hari nka Ministeri zagombaga gukoresha cyane IKINYARWANDA ku mbuga zazo bitewe n’abo zireberera kandi bazigana: ubuzima, ubuhinzi n’ubworozi, ubutabera, ibikorwa-remezo, umurimo…

Ururimi ni ikimenyetso cy’Ubwigenge, Ubuhake cyangwa Ubukoloni

Biragaragara ko kwanga gukoresha Ikinyarwanda bitari ibyo mu Nzego z’Ibanze gusa aho abayobozi bihangishaho indimi z’amahanga bashaka kwemeza abaturage ko bize!Yewe si n’ibyo kwa Muganga(Ibitaro n’Ibigo Nderabuzima)aho ibintu hafi ya byose biba byanditse mu Cyongereza kandi abarwayi bahunyeza mu Kinyarwanda.

CHUK.rw

Abashishoza bazi neza ko nta gihugu kigenga by’ukuri kandi kiyubashye uzasanga abayobozi bakoresha indimi ntirano haba mu mbwirwaruhame cyangwa ku mbuga(web sites) zabo. Baba banga kwitesha agaciro no gupfobya iby’iwabo.

Kuri bo, ururimi Kavukire ni ishema ry’igihugu n’ubukungu ntagereranywa ku buryo uwinjiye mu gihugu cyabo aba agomba kwiga urwo rurimi yanze akunze. Ingero ni nyinshi: Ubudage, Ubutaliyani, Uburusiya, Ubushinwa, Ubufaransa…

Uretse no gutuma abanyamahanga barukunda(kabone n’iyo byaba ku ngufu), gukoresha Ururimi Gakondo bitanga n’akazi ku bize iby’isobanurandimi(interprètes). Kuki abangaba bo babuzwa ayo mahirwe?

Ku rundi ruhande ariko, ururimi burya ni ikimenyetso cy’ubuhake. Ntushobora kuvuga ko wigobotoye Gashakabuhake, ukirwana no kuvuga ururimi rwe nk’aho ari we uguha ijambo cyagwa uri kumwereka ko ibyo yakwigishije wabifashe.

Njye mbona igitego cy’Ubukoloni ari icyo kutwumvisha ko indimi Gakondo ari « ingirwandimi »(dialectes)n’ubwo zaba zivugwa n’amamiliyoni akangari y’abantu. Kandi koko hari n’ibihugu abaturage badashobora kumvikana badakoresheje ururimi rw’umukoloni(Icyongereza, Igifaransa, Igiporutigari, Icyesipanyori…)kimwe n’uko hari n’ubukoloni bushya twikururira muri urwo rurimi rushya rukomeza kutubera umurunga utuziritse.

Dutandukanye Ururimi Gakondo n’Ururimi Kavukire

Hari abantu bakomeza kuvuga izo ndimi twita ko ari iz’amahanga kandi kuri bo ari « Kavukire »kuko bavukiye iyo mu mahanga batavukiye mu Rwanda. Ururimi kavukire ni urw’aho hantu yavukiye akanaharererwa.

Naho Ururimi Gakondo rwo ni urujyanjye n’inkomoko, igisekuru(des origines). Ni rwa rundi bamwe musangiye ubwenegihugu(nationalité) bakubaza ngo « ururimi rw’iwanyu ni uruhe »? « Gira icyo utubwira mu rurimi rw’iwanyu? »

Iyo watangiye guhura n’ibyo bibazo ni bwo utera intambwe yo gukunda ururimi Gakondo kandi ukarukomeraho. N’ibisubizo biraza maze wowe na bo rukababera iteme ribahuza mu bwuzuzanye kuko basanga nawe hari ibindi ubarusha.

Dukunde kandi tuvuge ururimi rwacu rw’IKINYARWANDA, duhere ku bakuru n’aho bakorera kugira ngo n’abato baberwe n’icyo kirezi.

By P.Protogène BUTERA

Menya aho uyu mugani waturutse: Kwigira KABUTINDI nka NDINDA

Ndinda yabaye aho, maze agakunda kubenga bitari iby’abandi; umukobwa bamusabiye wese akamubenga. Baramubwiraga bati: « Tugiye kugushakira umugeni. Ndinda akaririmba agira, ati: « Oya si uyu Ndinda, kandi aho Ndinda kandi emwe Ndinda! »
Umunsi umwe bajya gusabira Ndinda umukobwa Nyirataba, umukobwa w’itaba ry’Iminyana, Ndinda amubonye ati: « Si uyu Ndinda, kandi aho Ndinda, kandi emwe aho Ndinda »

Nyirasenge aramutonganya cyane, ati: « Nta wundi mukobwa uteze kubona uzaza ahwanye na Nyirataba dore ko ugiye kubenga kurusha imitwe n’imitali!Ndinda aramwihorera aragenda, abanga umuheto ashyiramo imyambi ajya guhiga. Undi munsi se aramutumira ngo aze amwitabe. Ndinda araza, asanga bamuzaniye Nyirantagorama umukobwa w’intege ndende. Ndinda aramwitegereza ati: »Si uyu Ndinda kandi aho Ndinda kandi emwe aho Ndinda! »

Nyina aramwihererana aramutonganya ati: « Dore so agiye kukuzinukwa ntazongera kujya kugusabira umugeni, umaze kwigira Kabutindi, wananiye nyogosenge, nanjye urananiye; gira vuba wisubireho, wibwire. » Ndinda ntiyamurora ntiyamwumva, aragenda ajya guhiga.

Se aratinda yongera kumutumaho ngo naze amwitabe. Ndinda araza, bamuzanira umukobwa w’intebe y’umuringa akagira izuru ry’umutali. Ndinda amubonye ati: »Ni uyu Ndinda kandi aho Ndinda, ngwino yewe ga Ndinda! » Bagiye gutaha ubukwe, Ndinda bamuhitisha mu nzoga ngo avuge iyo ashaka. Abagira nk’uko yari yabagize yanga abageni,ngo ntashaka inzoga bamuhaye. Ndinda bamuhaye inzoga y’urwagwa, ngo ntanywa uruzira-nkashi.

Ubukwe burataha, ariko bakababazwa n’uko Ndinda atanywa inzoga nk’abandi. Abandi bahungu bati: »Ko utanywa inzoga ubitewe n’iki? Ndinda akabihorera. Bamuzanira inzoga y’inturire, Ndinda arasogongera arayicira, ngo ntanywa uruziramvuzo. Bimaze umwanya babwira mushiki we ngo namuhe inzoga y’ubuki. Ndinda inzoga arayanga ngo ntanywa uruzira-nsinda.

Ndinda yari umwana w’umuhinza w’icyo gihugu, ni cyo cyatumaga yigira ibyo byose. Nuko umugeni abonye ibyo Ndinda yigira, ati: »Sinsigara aha! Ati: »Ese muransiga mugende muvuga ngo munsize he? Singiye gusigarana n’ikirura gitinya abantu, ngo ni ubukire nkurikiye, ndabahakaniye. Nuko umugeni arahaguruka n’abakwe baje kumushyingira, asubira iwabo. Si njye wahera….

Twibaze rero…

1-Muri ibi bihe turimo, kwigira Kabutindi nka Ndinda biracyashoboka? Ese buriya, ari Ndinda cyangwa ababyeyi, uwari uri mu kuri ni nde? Bariya bakobwa bombi,Nyirataba na Nyirantagorma,Ndinda yabajijije iki ababenga?Nyuma se yahisemo neza? Nimumbwire namwe isomo byadusigira…

Sources: Mgr Aloys Bigirumwami, Ibitekerezo, Nyundo, 1971, p.38

By Protogène BUTERA

Mu mashuri y’iki gihe,ni « Bye bye Kinyarwanda! »

« Bye bye Nyakatsi » yavuye mu nzira,none hagezweho « Bye bye Kinyarwanda. » Wagira ngo ni ngombwa ko buri mwaka haboneka abantu bagomba kwibasirwa.

Ejo bundi naratangaye cyane mbonye umwana w’umuturanyi wanjye yirukaniwe ko yavuze Ikinyarwanda.Nabanje gushidikanya ngira ngo ni iby’ab’ubu bikoza ku ishuri bakagaruka bagira ngo ababyeyi babongere amafaranga.

N’amarira menshi,uwo mupfakazi urera wenyine abana batanu,barimo batatu bageze mu yisumbuye,yaje gutakambira Urwego rw’Abagore ngo rumugire inama uko yabyifatamo.

Twatumiye umukobwa we usigaje umwaka umwe ngo arangize amashuri.Yaduhaye number za mugenzi we na we wirukanwe ngo tutibwira ko ari ibyo yihangishijeho.Yaratuririye turumirwa.

Azakurwaho amanota atumwe n’ababyeyi

Iri tegeko ryaje ari gatumwa!Ngo umwana akurwaho amanota,byakongera agatumwa n’ababyeyi.Si abana bacu gusa, kuko natwe ibyo bihano bitugeraho.

Abo bayobozi babo babona bayora buri kwezi bakagira ngo natwe ni uko?Ntibyumvikana ukuntu birengagiza ubukene buri hanze aha bakatugerekaho uwo mutwaro.Ni gute nzaba nabuze n’ay’ishuri nkajya kurwana n’ayo matike ya hato na hato?

Ibiri amambu ngo biga kwigisha abandi(TTC)

N’ubwo biga kwigisha abandi,aba bana ntibumva impamvu y’iyi myigishirize (méthodologie). Ikindi ni uko bo muri stage batemerewe gukoresha ubu buryo busa n’ubwo guca intege abanyeshuri.

Abana bo babivuga rimwe na rimwe baseka mu rwego rwo kubinnyega,tuti « Ni iby’abana, buriya ntibumva uburemere bwabyo. » Barira, na bwo tuti « Ntabwo, buriya ntibazasubira kuri icyo kigo. »Ni ibibazo!

Byahozeho ku bw’abazungu!

Nk’ababyeyi twabiganiriyeho,twibukiranya ukuntu ibi byahozeho ku bw’abazungu!Ni bo baduhatiraga kuvuga Igifaransa,uvuze Ikinyarwanda bakamupfukamisha,cyangwa akirirwa yambaye inzogera,nk’ikimenyetso ko ari imbwa (y’impigi!)

Ariko cyaraziraga kugira uwo birukana, kuko babaga bamuhaye urwaho rwo kuva mu ishuri no kurireka burundu.Birababaje kubona ibyo bintu bigarutse muri iki kinyejana!Turatabaza!

By Nyirasafari Consolée/Akarere ka Gisagara

Kigali:Icyongeleza kirahatirwa intebe abandi bagitera umugeri

Hano muri Kigali hamaze kuba nko mu mahanga.Umuntu utavuga Icyongereza ntaba ari umunyamujyi.Bigeze n’aho Ikinyarwanda,ururimi rwacu kavukire rusigaye rwitwa urw’injiji n’abanyacyaro.Noneho n’abarimu ngo bagomba rwose kwirinda kuvuga Ikinyarwanda!

Ahandi usanga baba bakomeye ku ndimi z’ibihugu byabo,bagashyiraho n’uburyo bwo kugira ngo zivugwe henshi birenze imipaka y’igihugu.Uko bagenda barutana mu gukomera,ni nako n’indimi zabo zitabirwa. Nuko abemeye ubwo buhake bushya bagata ikirezi bakiyambika izo ncurikirane.Ntihari n’abatangiye gusimbuza Igishinwa indimi z’Iburayi,cyangwa Icyongeleza kigaharira Igiswahiri?

Hano iwacu ho,nsigaye ntangazwa n’uko iyo utwaye umuzungu mwerekeza muri Pariki y’Ibirunga cyangwa y’Akagera,mukavugana mu Cyongereza, akubaza niba igihungu cyanyu cyarakolonejwe n’Abongeleza.Noneho mwavugana n’undi Igifaransa,na we ntatinde kukubaza niba mwarakolonejwe n’Abafaransa.

Biratangaje rero kubona igihugu kitwa ko kigenga gikomeza gushyira imbere izo ndimi z’abakoloni kandi tuzi neza aho batugejeje.Ese byaba biterwa no kwisuzugura, cyangwa ni bwa bukene bwatwaritse no mu mitwe(pauvreté mentale),ku buryo ikintu cya bene Rutuku ari cyo kiba gifite agaciro?

Mu gihe Icyongereza kiri hafi gukurwa mu ndimi shingiro zikoreshwa mu nama z’Uburayi kubera BREXIT,hano i Kigali ho barakomeza kukibariza intebe.Si mu biro bya Leta gusa kuko no kwa muganga abatize aya vuba aha, bisigaye biba ngombwa kwitwaza umwana wize  « nayini »  ngo ababyeyi bamenye amabwiriza y’ibanze y’ibyanditse aho  mu Bitaro.

Rwose ibyo bintu byo kuvuna abo ubwira ubazanaho indimi batumva neza,abayobozi bakuru bacu bari bamaze kubicikaho.None byimukiye mu nzego z’ibanze no muri za serivisi zigenewe abenegihugu.Mbere abantu bibwiraga ko ari intambara hagati y’Icyongereza n’Igifaransa!Ubu se koko iyi myambi yadutse ku Kinyarwanda,yo yaba itewe n’iki?Tuzayikizwa n’iki?Turatabaza.Aho bukera,n’uzajya guhatanira akazi cyangwa isoko,arajya agomba gusubiza iki kibazo: « Do you speak English? »

By Nkubiyaho Joas/Gasabo

%d blogueurs aiment cette page :