Umucyo w’icyumweru cy’Ubutatu Butagatifu: Ibyishimo biba ahari amahoro

Nyuma y’umunsi mukuru wa Pentekosti,Kiliziya gatolika yizihiza indi minsi mikuru itatu igaragaza uko Roho Mutagatifu twahawe adufasha gucengerwa n’ikibatsi cy’urukundo rukomeye Imana yadukunze muri Kristu Yezu.

Iyo minsi mikuru ni Ubutatu Butagatifu,Isakramentu Ritagatifu n’Umutima Mutagatifu wa Yezu.Kuri iki cyumweru rero Kiliziya iradushishikariza kuzirikana ku Butatu Butagafifu.

Amasomo ya Liturijiya uko ari 3 y’umwaka A ,aratugaragariza neza uko Imana igendana n’abayo(isomo rya mbere,Iyim.34,4b-6.8-9)bemera Umwana wayo muri iyi si ngo bagire ubugingo kandi batsinde ikibi(Ivanjili,Yh 3,16-18).

Uburyo bwo kubigeraho n’uko bigaragara mu buzima, turabisanga mu isomo rya kabiri(2Kor 13,11-13),ari ryo ngira ngo dusome kandi dusangire twitonze:

« Ahasigaye rero,bavandimwe,muhorane ibyishimo,mutere imbere, muterana inkunga,mushyire hamwe,mubane mu ituze,bityo Imana yuje urukundo n’amahoro izabana namwe.

Muramukanye mu muhoberano mutagatifu.Abatagatifujwe bose b’ino barabaramutsa.Ineza y’Umwami wacu Yezu Kristu,n’urukundo rw’Imana Data,n’ubusabane kuri Roho Mutagatifu,bihorane namwe mwese. »

 

Reka duhere aha twibaze ibi bibazo:Abo isi yamaze guciraho urw’iteka bazabona igihe cyo gutera imbere?Abadashobora no gusuhuzanya bazabasha gushyira hamwe igihe kirekire ?Ko ntawishimira ko abayeho nabi,abahorana ibibazo bazagira amahoro bate?

Ese ubundi,igipimo cy’ibyishimo cyo cyaba ikihe ahantu hatari amahoro nyayo?Sinshidikanya ko ibisubizo binyuranye.Hari n’abavuga ngo « Ijoro ribara uwariraye! »

Naho abandi bo ngo ya mazina ya kera nka  « Mbonabucya » cyangwa  « Mbarubukeye » ntibakiyita gutyo abana babo, ahubwo bayahindura mu ndimi z’amahanga cyangwa zizimije kugira ngo hatagira umenya ko bo ubwabo ari ba « Nsekambabaye ».

Dusabe Nyagasani ngo ahe buri wese ya ngabire y’ibyishimo n’amahoro yifuza n’umutima we wose.Mbifurije rero icyumweru cyiza cy’Ubutatu Butagatifu,dore Ijambo ry’Imana ryatweretse ingingo z’urubanza.

By P.B

Pasika Nziza:Turirimbe tunezerewe alléluia

Tubifurije mwese Pasika Nziza!

Joyeuses fêtes de Pâques
Happy Easter

Yezu yazutse:turirimbe tunezerewe Alléluia!

Ababishoboye bacinye akadiho.

By P.B

Ari amanywa cyangwa ijoro, igikomeye ni ikihe?

Iki ni ikibazo umuntu yakwibaza ahereye ku isomo rya kabiri ryo kuri iki cyumweru cya mbere cya Adiventi,aho Pawulo aduha inama nk’izo yageneye Abanyaroma(Rm 13,11-14a):

« Cyane cyane mumenye ko aya magingo turimo,ari igihe cyo gushiguka mu bitotsi,kuko ukurokorwa kuturi hafi ubu ngubu kurusha igihe twakiriye ukwemera.Ijoro rirakuze umunsi ugiye gucya.Nitwiyake rero ibikorwa by’umwijima maze twamabare intwaro z’urumuri.Tugendane umurava nk’abagenda ku mugaragaro(amanywa),nta businzi,nta busambanyi,nta biterasoni,nta ntonganya,nta shyari.Ahubwo nimwiyambike Nyagasani Yezu Kristu. »

Ngo « ubara ijoro ni uwariraye ».Abarara bahagaze cyangwa babunza imitima bukarinda bucya,ku mpamvu zinyuranye,bazi neza uko biyambaza Yezu ndetse na Nyina ngo babone umuti n’igisubizo.

Ku manywa ho,ibisubizo byose aba ari bimwe:nta kibazo,ni sawa…Abenshi basubiza batyo nk’abadafite igihe.Abandi igihe kibabana kirekire pe,bukanga kwira kuko babuze uko bagira.Bwakwira nanone bugatinda gucya,ijoro rikareshya n’inzira.

Abakubitira abana kuryama kubera inzara,ntibaba bazi niba ababo bari bubone ibitotsi.Babigenza gutyo kuko baba batekereza ko ari byo byonyine byabatabara.Hari n’abadashobora kwiyaka biriya bikorwa by’umwijima kuko ari byo bituma bagoheka.Ni bwo bamwe bagasoma bakakuzuza ibondo kuko bazi ko mu rugo nta kindi bari buhasange cyo gushyira mu nda.

Ababyeyi babuze ayo bacira n’ayo bamira kubera amarira y’abana, hari ubwo bakizwa n’intonganya za wa mugabo utaha yivovota,abana bamwumva bakagira ngo ni intare, maze buri wese akirukira mu kirago,ni uko ibitotsi bikamutwara ku ngufu,agasinzira atabishaka.

Kuva mu bitotsi nk’ibyo ni ugushaka igisumbyeho no guhindura ingendo.Uwo wahungaga cyangwa bahungaga,azitoza gusangira no gutega amatwi ikibatera ayo amarira.Abasinzira ku manywa kuko baraye bakanuye ijoro ryose, bazamenyeraho igikomeye gikwiye gukurwaho.

Uwabafasha ni uwasubiza aka kabazo k’amayobera(devinette): nshobora kugenda ijoro n’umunsi ntataye umurongo.Haba hashyushye cyangwa hakonje,nta gisibya nkomeza urugendo.Abanjye,iyo mbiyeretse bakangutse baranyurwa.Ubwo ndi nde?

Icyumweru cyiza kuri buri wese.
By P.B

Ubucakara n’ubuhake birakomeje mu bigo by’Abihayimana nk’aho Roho wayo atarahagera

Bava iwabo bazi ko bagiye kwiha Imana.Kandi baba baramaze gucengezwamo ko nta cyiza kibaho gisumba gukorera Imana.Ibi bivuze ko baba bahakanye gukorera ifaranga!Rimwe na rimwe n’inyito z’iyo miryango ibakira ziba zisobanutse.Urugero ni « Les Travailleuses missionnaires ».

Marie Louise yarangije secondaire abura akazi. Kera kabaye, umuhamagaro umuzamo. Ababikira bo muri uwo muryango baramwihata, na we arawukunda. Yinjiramo yibwira ko n’iyo batahemba aya Mirenge,umutaravayeze yahabwa nibura aya misiyo.

Novisiya yarayihanganiye kuko aba ari nk’igeregeza.Amaze gusezerana, ni bwo yabonye icyo yahamagariwe:gukorera umuryango (congrégation)aho gukorera Imana.Kandi koko, ubuzima ni imirimo gusa.Utaretse ko hari imirimo y’abazungu n’iy’Abirabura.

Mu myaka 15 yamaze mu Muryango, yakoze nk’umucakara.Buri gihe yahoraga yibaza impamvu abo bazungu batemera ko ababikira b’Abirabura bajya gukorera i Burayi.Ariko byagezeho birikora kuko abenshi bamaze guhetama imigongo nta n’abato bakinjira.

Boherejwe ari batanu:2 mu gihugu cy’ Ubutaliyani, 2 mu cy’Ubufaransa n’umwe muri Esipanye. Mu myaka 2, bari bamaze gusobanurirwa uburenganzira bw’umukozi ku mushahara no guteganyirizwa iza bukuru. Batangira kwibaza igice baherereyemo, birabayobera.

Nyamara bari gukomeza kubyihanganira, iyaba batahozwagaho incyuro, ngo mu bihugu by’iwabo nta biryo bihaba.Mbese nko kubabwira ngo ikibakwiye ni ugukorera ibiryo.Umubi ni uwavuga ngo n’amayero ntayo mugira,
nimuyakorere tuyabahe cyangwa reka tuyabahe muba mwayakoreye!

Bigeraho bikarambirana

Kubera iyo ndishyi,bamwe muri bo bari batangiye kurwara imitwe idakira,abandi bafatwa n’ibifu, na za ndwara zidasobanutse muganga apima akabura ibimenyetso. Yewe n’icyumweru nticyari kikibashishikaje.

Aho batangiriye inzira yo guharanira kugira uburenganzira bungana n’ubw’abandi,bafite agahenge ku mutima kubera amategeko abarengera, ariko muri ibyo bigo ho ngo ni intambara.

Pentekosti 1Ese kuri iyi Pentekosti, ayo mazu bateraniramo azagerwaho na ya nkubi y’umuyaga uva mu ijuru ku buryo indimi zabo zumvikana?(Act 2,1-4). Nibyanga, bazazirikane iri jambo rya Yezu bemera:

« Umuvugizi, Roho Mutagatifu,Data azohereza mu izina ryanje,ni we uzabigisha byose kandi abibutse n’ibyo nabigishije byose »(Yohani 14,26)

Isomo rya kabiri ryo kuri iki cyumweru riratwereka ko nta mpamvu yo kwirengagiza uwo Muvugizi:

Ntimwahawe roho y’ubucakara ibasubiza nanone mu bwoba,ahubwo mwahawe roho ibagira abana bishingiwe kibyeyi,igatuma dutera hejuru tuti « Abba!Data! »

Roho uwo nyine afatanya na roho yacu guhamya ko turi abana b’Imana.Kandi ubwo turi abana, turi n’abagenerwamurage(héritiers) b’Imana, bityo n’abasangiramurage ba Kristu niba ariko tubabarana na We ngo tuzahabwe ikuzo hamwe na We.(Rom 8,15-17)

Abamuraritse, mbifurije kumwakira neza.Na We araje, asesekare ku ruhanga rwanyu n’aho iwanyu, ngo umugizi wa nabi atazabahangara.

By P.B

Pasika Nziza!Umwana w’Umuntu ntakiri mu mva

Utazi umwana w’umuntu aramubarirwa
Mu minsi ya nyuma bamugize Ruharwa.
Abaturanyi be bamuciriyeho;
Ubwo imyenda yari yamucikiyeho
05.Baramuherekeje mpaka no mu mva
Ngo buriya ntawe uzongera kumwumva.

Muberarumuri ntiyabebereye!
Aho atsindiye urupfu akazuka
Na we yaberetse aho abera icyago
10.Dore abasigiye n’iki cyigwa:
Abagituye mu myotsi nimurire
Ntimuzaruha mugana iwanjye
Ndi umuriro watse turituri
Ngo ab’akazuyazi bazashyuhe
15.Nibatagendana imbeho bataha.

Niba mutinya ab’imbere iyo
Naruguruye nimwinjire.
Mwijya kure y’iri juru
Mwanyimitse muri iri joro;
20.N’ubwo intambwe atari zimwe
Mbifurije kuba umwe
Ni bwo amajwi yanyu azaryoha
Mukumva namwe uko muriho
25.Muhimbajwe no kwimura intimba.
Ababibashaka tumuririmbe
N’ababishoboye bamuhe impundu:

Pasika nziza kuri mwese!

By P.B

Akamaro k’amashami atakiri ku giti

Mu kwitegura icyumweru cya Mashami,Claudia ntiyibagirwa abuzukuru be.Abategurira amashami bazitwaza mu munsi mukuru w’icyumweru gisoza igisibo.Mervan na Jeanne ntibasinzira iyo bayakikiye.

Ubushize barayatahanye bayataka mu nzu,ariko bababazwa n’uko yumiranye vuba.Ubwo baherutse kumusura, Kaka yababajije niba bazamuherekeza mu Misa ya Mashami. Yibwiraga ko batazemera.Ahubwo batangira kumuhata ibibazo.

Mervan ati « Uyu mwaka noneho amashami tuzayamaza iki? » Jeanne yitanguranwa gusubiza ati « Tuzayashyira Papi hamwe ashyinguye,tumubwire ko tukimwibuka.None se amashami yahawe umugisha ntarusha agaciro izindi ndabo,Mami? »

Claudia arabahobera cyane. Ati « Nanjye reka mbabaze rero:burya iyo abakristu bazunguza amashami,bishushanya iki mu mitwe yanyu mwebwe abakiri bato?  » Mervan ati « Njye binyereka ibyishimo by’abantu bahuje imitima. » Naho Jeanne we ati « Njye bimbwira ko amashami atakiri ku giti ari abantu batuma agira akamaro,n’ubwo ari bo bayatema. »

Amashami1Claudia arabashimira cyane.Ati « Sinarinzi ko mwakuze bigeze aho! » Gusa rero mumenye ko uturere n’ibihugu bakoresha ubwoko bw’amashami atandukanye.Impamvu nta yindi ni uko ibibashimisha n’ibibagirira akamaro na byo atari bimwe.Buriya mu Misa muzabyumva kurushaho!

Icyumweru cyiza cya Mashami kuri buri wese witeguye kudatesha agaciro ububabare bwa Kristu.Uwabishobora yakisomera amasomo ya Liturijiya yo kuri iki cyumweru:
Kuramya Yezu agana i Yeruzalemu:Luc 19,28-40
Kuzirikana Ububabare bw’Umukiza: Is50,4-7
Phi.2,6-11
Luc 23,1-49

By P.B