Kiliziya-Covid: Ngo Abepiskopi bagizwe ibiragi byo gutabarizwa!

Kuri uyu wa kane gashyantare(4 février)hatangiye gukwirakwizwa ubutumwa bugaragaza agahinda abagatolika batewe no kugira abashumba batavugira intama bayoboye. Ibyo biri mu ibaruwa ifunguye yanditswe n’abiyita ko bahagarariye abandi bakristu.

Iyo baruwa yarushijeho gusakara ubwo hamenyekanaga inkuru y’ishyirwaho ry’umwepiskopi mushya wa Diyosezi ya Cyangugu, ariwe Mgr Edouard SINAYOBYE. Uko kuyikwirakwiza kandi byarushijeho kongera ubukana ubwo Mgr Célestin HAKIZIMANA wa Diyosezi ya GIKONGORO yabuzwaga n’abapolisi kurenga Nyamagabe, aho yari yerekeje i Huye guhura na mugenzi we wa Diyosezi ya BUTARE, Mgr Philippe RUKAMBA.

Mgr Célestin HAKIZIMANA(évêque de Gikongoro)
Mgr Célestin wa Gikongoro Polisi imubujije kugenda n’imodoka ajya i BUTARE

Ngo imodoka yari arimo yasubijwe ku Gikongoro(Nyamagabe)maze uwo MUSENYERI inzira ayihata ibirenge kugeza ahuye n’ivuye i Huye ije kumufata! Ababibonye bati « Ibi ni AKAGA! » Abandi bati  » Yiboneye na we urwo hanze aha dupfuye. « Ese azakomeza kugendera mu BICU?

Icyo abo bakristu bashinja abepiskopi

Ubusanzwe Kiliziya Gatolika yemera ko uwabatijwe wese afite uburenganzira bwo gutanga ibitekerezo bivuye ku mutimanama we(conscience)kuko bishobora kugira akamaro iyo biyobowe na Roho Mutagatifu(Esprit Saint). Birakwiye kwibaza ibi bibazo: Ibirego by’aba bakristu bifite ishingiro? Ese Abepiskopi bafite ububasha buruta ubw’abandi baturage(citoyens)?Urwego rwabo se rutuma basimbura INTUMWA ZA RUBANDA(Députés)?Ese abataka cyangwa batabaza bo batumwe na nde by’ukuri?

Birazwi neza ko « Ntawe utaka atababaye. » Mu bibabaje abo bakristu twabishyira mu bice bitatu: a) Icya mbere ngo ni uko abepiskopi 2 bonyine(kuri 7 bariho mu Rwanda) aribo bemeye kubakira no kubatega amatwi. Ngo n’ubwo ntacyo byatanze kuva muri 2020, baruse ababamaganiye kure, bakabashumurira ababatera ubwoba.

b)Icya kabiri ngo bababajwe no kugira KARIDINALI ukomeje kwicecekera kandi ibintu bicika. Baragira bati:  » Uwo Karidinali n’abanyamadini badafasha Leta kugaruka ku murongo mwiza, bakorera nde »?

c)Icya gatatu ngo ni uko bari bamenyereye kubona « IBARUWA Y’ABEPISKOPI IGENEWE ABAKRISTU » ibahumuriza mu bihe bikomeye, ikabaha n’umurongo w’imyitwarire ikwiye mu gihe cy’amage. Iki gihe kikajyana n’ibyo bise « Corona-Nyarwanda »(ingamba zihabanye n’iz’ibihugu bituranyi..), « GumamuRugo na GumamuKarere » ziri gusenya imiryango, « kugambanira abakristu kubera kwemera ko Insengero zifungwa » no mu bice amashuri afunguye…

Publicités

Bati « kurebera bizageza ryari? »

Mu byemezo by’inama y’abaministri biherutse(2/2/2021)kuba baravuze ngo »Insengero zizakomeza gufunga imiryango« maze Abepiskopi bagakora nk’aho ntacyo bibatwaye, ngo « ni ukugwa mu mutego w’abashaka kwerekana ko umuntu yabaho neza adasenga kandi akabaho. »

Hagati aho ariko abantu babayeho nabi kubera IMISORO ikomeza kwakwa abadakora(ubutaka, code y’amazu..); hari kandi na « Tanga ibihumbi 10 wambaye agapfukamunwa nabi!« ; « Rara muri Stade »kandi abahawe icyo gihano batabanje gupimwa iyo Covid! Ibibazo ni byinshi…Kandi ngo « uwahawe byinshi azabazwa byinshi, akubitwe n’inkoni nyinshi!! »,ni ko Ivanjili itwigisha. Aha! Nkanswe mwebwe musanzwe mwitwaza izo nkoni!

Isomere iyo baruwa yose nawe wiyumvire kandi ushishoze ukuri kw’ibivugwa. Ushobora kubivuguruza muri commentaires:

By P.Protogène BUTERA