Imikino:Amavubi azanzamukiye kuri Seychelles ayitsinda bidasubirwaho.

Ikipe y’igihugu Amavubi yahiriwe n’urugendo muri Seychelles kuko kuri uyu wa 5 Nzeri yatsinze 3-0

Hari hashize imyaka irenga 3 ikipe y’Amavubi y’u Rwanda yaraguyemo imbeho.Nta mukino n’umwe yaherukaga gutsinda. Iryavuzwe riratashye:Amavubi bayahunguye amababa!Abakunzi bayo bari barihebye. None kuri uyu wa kane tariki ya 5 Nzeri yazanzamukiye ku ikipe y’igihugu cya Seychelles iri ku mwanya wa 192 ku rutonde rwa FIFA rw’ibihugu 211.

Equipe de Seychelles
Equipe Seychelles

N’ubwo u Rwanda na rwo rutari shyashya kuko ruri ku mwanya wa 133, mu murwa mukuru Victoria w’icyo gihugu cyabereyemo umukino ubanza,abatoza bombi bahiganaga kuhanyurana umucyo bavuye muri stade yari yambaye ubusa kuko abafana batarengaga ijana.

Nuko ikipe ya Mashami Vincent,umutoza kavukire,yikoreza umutwaro w’ibitego 3 byose ikipe itozwa n’umuzungu Dutchman Jan Mark.Bazaza i Kigali rero ku wa 2 tariki ya 10 bawikoreye.Ese abasore ba Mashami bazongeramo izindi  ngiga kugira ngo ibiro birushe abo muri Seychelles uburemere cyangwa n’abandi bazabagira aka wa mugani ngo « Akebo kajya iwa Mugarura! » Birashoboka ko na bo babishyura…

Equipe Amavubi
Amavubi yishimira intsinzi

Reka dutegereze turebe niba Abanyarwanda na bo bazagira ibyishimo byo kubarwa mu makipe azahagararira Afurika mu gikombe cy’Isi kizabera mu gihugu cya Qatar 2022. Birasaba kutirara no gukora imyitozo myinshi kuko batazahora bahura n’udukipe tworoshye.

Robert MUGABE iminsi iramwivuganye!

Robert Mugabe yemezaga ko atazapfa atarageza ku myaka 100.Ariko burya koko ntawe ujya inama n’urupfu. Muri iri joro ryo ku wa kane rishyira ku wa gatanu tariki ya 6 Nzeli 2019, ruramunyomoje kuko rumwivuganye ari hafi kuzuza 96.

Yarwaniye ubwigenge bw’igihugu cye cya Zimbabwe cyagezeho muri 1980 kigobotora ubukoloni bw’Abongeleza. Cyabugezeho muri 1980 agitegeka imyaka 7 ari Ministiri w’Intebe na 30 ari Prezida wa Repubulika kuko yakuwe ku butegetsi n’igisirikare muri 2017 bikozwe mu mutuzo.Zimbabwe: Robert Mugabe qui espérait mourir calmement dans son fauteuil présidentiel…

Abakurambere bacu babivuze ukuri ngo « Iminsi iteka inzovu mu rwabya« .Yamaze imyaka 10 mu buroko bw’Abongeleza mu gihe cya Ian Smith, none urupfu rumuzingiye ah’iteka. Prezida wamusimbuye ku ntebe, Emmerson Mnangagwa ati: « Umurwanashyaka, Camarade Robert Gabriel Mugabe naruhukire mu mahoro. »

Mugabe et Ian Smith

Nyamara uwarwanyije ubwibone bw’abazungu aguye ishyanga mu bitaro bya Singapour aho yivurizaga kuva mu kwezi kwa kane, n’ubwo na mbere akiri Prezida byari byo bitaro bye!Ese kuki muri iyo myaka yose atabashije kubakira igihugu cye ibitaro bifite ubushobozi bw »igihugu kibohoye?

Ese bazamwibuka koko nk’uwateje igihugu cye imbere cyangwa nk’umunyagitugu(dictateur)?Ibi bikwiriye kubera isomo abandi bategetsi b’ibihugu bitari bike bya Afurika.

By Protogène BUTERA

%d blogueurs aiment cette page :