Biravugwa ko :Nyabarongo igiye kubona ikiraro kiyikwiriye

Izi si inzozi

Mu Rwanda hari imigezi n’amasoko bitagira ingano.Izuba rirarasa,imigezi n’ibiyaga bigakama.Imvura yagwa bikabuza rubanda gukora no kugenda.Si inzozi rero ko byahinduka.

Muri iyo mihindukire, nibaza ibi bibazo:ntibyashoboka ko buri mujyi(Akarere)na buri Murenge bateganya aho amazi y’imvura(eaux de pluie) n’ayakoreshejwe(eaux usées)yajya yerekeza cyangwa aruhukira ku buryo asukurwa akongera gukoreshwa?Ese kuvuga ngo buri wese nafate ayo ku nzu ye, birahagije?Ava mu mihanda no ku misozi azafatwa na nde?Naho se twa tugezi duto two mu Mirenge?

Inzuzi zacu zabyazwa umusaruro

Inzuzi n’imigezi bitatse imisozi yacu bishobora kubyazwa umusaruro usumbye uwo gucukurwamo umucanga. Kubona byuzura bikadutwara ubutaka n’abantu,nta kuntu twabigabanyiriza umuvuduko maze bikatugirira akamaro aho kudusenyera?Kuki kuri buri mugezi hatateganywa inyoboramazi(écluses)ku buryo harekurwa amazi akenewe?

Kuki ku migezi minini nka Mwogo, Mbirurume, Ruhwa,Satinskyi,Rukarara n’iyindi… hatajyaho
intingo(barrages)hepfo no haruguru,maze aho bishoboka hagakorwa inzira-bwato(canal de navigation)twajya dutemberamo twitegereza ibyo byiza, cyangwa zikanyurwamo n’amato adutwarira ya mizigo ituvuna ibikanu n’imigongo?

Nyabarongo yo biri hafi

Bajyaga bavuga ngo « Nyabarongo yica abayizaniye! »Kandi koko iyo imvura yaguye, iruzura ku buryo umuntu uri muri Kigali cyangwa ugomba kuyinjiramo aturutse za Muhanga na Huye nta handi yanyura.

Ari epfo cyangwa ruguru,hose yagusamura!Na twa tugezi duto tuyisukamo,tuba twariye Karungu.Abihebyi ni bo batwisukira.Ibyo rero, ngo abategetsi bacu batiteye imboni.Biravugwa ko biyemeje kwitabaza inshuti.

NyabarongoNgo mu minsi mike Abanyakoreya y’Epfo barahagoboka rwose.Kuva ubwo Nyabarongo aho kutumira no kuduhekura,izaducanira,tuyigendeho ku bwinshi(plusieurs voies)ndetse tunayitureho.Mbega ibyiza!

By P.B

Imvura n’inkangu bikomeje kwiha inkumbi mu rwa Gasabo

Imvura nyishiAbarenga mirongo itanu bamaze guhitanwa n’imvura ndetse n’inkangu mu duce tunyuranye tw’Amajyaruguru.Haba Rubavu,Gakenke,Ngororero cyangwa Muhanga,abasizwe iheruheru na bo ni benshi.

Kuva kuri uyu wa mbere tariki 9 gicurasi, amarira ni yose.Ingo zagendesheje na zo ntizigira umubare.N’ubwo imihanda yatangiye gufungura gahoro gahoro,ibibazo ni byose.

Imvura nyinshi 1Ariko burya ngo ibyago bya bamwe ni yo mahirwe y’abandi.Abanyamatagisi mato n’abamenyereye guheka ku migongo baricinya icyara ngo icyashara cyabonetse.Abakora ku munwa ar’uko bavuye Kigali bo bumiwe.Intambara za tagisi

Nta mugayo kuko kwinjira muri Kigali cyangwa kuyisohokamo werekeza za Musanze(Ruhengeri)na Muhanga(Gitarama)byari intambara ikarishye. Nyabarongo na Nyabugogo zari zuzuye bidasubirwaho. Abantu babaye uruhuri hakurya no hakuno.Kubona umwanya mu mudoka byari iby’inkorokoro ku buryo n’izatwara imizigo zitanasize abantu.Nyabugogo yari yuzuye

Biteye agahinda
Koko rero mu Rwanda,kimwe no mu bihugu byinshi bya Afurika, imvura iragwa tukarushaho kurira ayo kwarika.Aho yakabaye igisubizo, igahita iba ikibazo,igatwara abantu n’ibintu.

Amazi y’imvura akava mu majyaruguru agasenyera abo mu majyepfo.Ejo bundi nanone izuba nirirasa,mu gihugu hose bazaba bataka ngo babuze amazi.

Amazi mu mihandaTwebwe n’ubwo tutize bihambaye,hari igihe twibaza niba uburyo bwo gufata neza amazi,kuyabika no kuyazigama nta Minisiteri bireba by’umwihariko ku buryo yabibazwa nk’itujuje inshingano zayo (responsabilité)kandi iteganyagihe ryari ryabyerekanye?Amazi se ntakwiye kujya mu bikorwa-remezo dore ko asiga yangije ibindi bikorwa bisanzwe nk’imihanda n’amateme?

Birumvikana ko ikihutirwa ubungugu ari ugutabara abasizwe iheruheru n’iyo mvura ndetse no kubashakira aho begeka umusaya.Ese hazakurikiraho iki mu kubikumira ku buryo buramba butari ukubwira abantu ngo nibimuke gusa,bave mu manegeka?

Imihanda yuzuye ibyondoIgiteye agahinda ni uko ejo n’ejo bundi nta kindi tuzakora uretse gukura isayo mu mihanda no mu mifurege tujugunya hepfo cyangwa haruguru. Imvura nisubizamo,ibyo haruguru bizongera byisuke muri ya mihanda,ibyo hepfo bijye gusenyera n’abandi.Bikaba bityo nk’ihene yizengurukaho (cercle vicieux). Umva ko dufite abatekinisiye mu Karere no ku Mirenge!

Aron Manirarora,Karuruma/Kigali

Imvura yabaraje rwa Ntambi

Muri Nyabihu,abantu 6 bamaze guhitanwa n’imvura.Ibyangiritse na byo ntibigira umubare.Uku kwezi kwa kane kwarabaziye.Byabaye agahomamunwa kuri iyi tariki ya 20 Mata.Abatapfuye cyangwa ngo bakomereke barasuhutse.Bari kurara rwa Ntambi ku gasozi.

No mu Karere ka Rutsiro(Umurenge wa Kivumu) na ho kuri uyu wa kane tariki ya 21 mu ijoro,inzu zabagwiriye baba nk’abaguweho n’ijuru.Bane bahasize ubuzima,barimo abana batatu.

Kandi abashinzwe iteganyagihe(météo)bemeza ko mu kwezi kwa Gicurasi imvura izikuba nka kabiri.Mu gihe bagitegereje ubutabazi bwo mu nzego zo hejuru(batazi igihe buzabagereraho),abaturage baratabarana baririra ababo n’imyaka yabo.Imvura

Nta gushidikanya ko n’inzara izakurikiraho izaba ari injyanamuntu.Ntituzi uko bizagenda.Naho amazu yasenyutse,no kongera kubaka bundi bushya,ni ikindi kibazo.

By Gashirabake Esron,Musanze